أَسْتَغْفِرُ اللهْ رَبَّ الْبَرَايَا * أَسْتَغْفِرُ اللهْ مِنَ الْخَطَايَا
رَبِّ زِدْنِي عِلْمًا نَافِعَا * وَوَفِّقْنِي عَمَلاً صَالِحَا
ياَ رَسُولَ اللهْ سَلاَمٌ عَلَيْكْ * يَا رَفِيْعَ الشَّانِ وَ الدَّرَجِ
عَطْفَةً يَّاجِيْرَةَ الْعَالَمِ * يَا أُهَيْلَ الْجُودِ وَالْكَرَمِ
Ngabiti kaula noles syiiran
Kalaban muji da’ ka Pangeran
Se mareng rohmat ban kanikmatan
Are malemma ta’ apetongan 2x
Du bala kanca lake’ bine’na
Ja’ pera’ ngaji syareat parcoma
penter adungging nulis ban maca
e’ budi are bakal sangsara 2x
Bannya’ se hafal Qur’an Haditssa
Senneng ngapere da’ ka laenna
Kaperra dibi’ ta’ apangrasa
Ja’ mase kotor ate akkalla 2x
Gampang tanoro’ napso angkara
E papaessa sonarra dunnya
Iri ban dengki sogina tangga
Pola atena petteng ban nista 2x
Tore taretan ja’ sampe’ loppa
Wajibba ngaji ban barakatta
Kangguy matebbel iman tauhitta
Bagussa sangu matena mulja 2x
E’ koca’ sholeh bagus atena
Karana mapan jangkep elmona
Jalan tarekat ban ma’refatta
Juga hakekat manjing rassana 2x
Al-Quran Qodim wahyu se molja
Ta’ usah toles bisa e baca
Neka baburuk guru se molja
E tanceppagi e dalem dada 2x
Cekka’ e’ ate ban pekkeran
Arasok e badan ka bai’ daleman
Mu’jizat rasul daddi panduman
Minangka jalan manjingnga iman 2x
Kalaban Allah se Maha Socce
are malemma kodu manyese
E ongguwagi kodu pagate
Dzikir ban suluk pa sampe’ lale 2x
Odi’na tennang arassa aman
Mantebba rassa tandana iman
Sabbar narema najjan pas-pasan
Sadaja takdir dari pangeran 2x
Kalaban kanca bala tatangga
Se pada rukun ja’ pada tega
Paneka sunnah Rosul se molja
Nabi Muhammad panutan kaula 2x
Tore lakoni sakabiyanna
Allah se bakal ngangka’ darajatta
Sanajjan asor tata dlahirra
Tatape molja maqom pangkatta 2x
Mun sampe’ dapa’ ka pungkasanna
Ta’ kera posang roh ban sukmana
E arep Allah suarga kennenganna
Paggun mayyitta ban bundu’na 2x
Tidak ada komentar:
Posting Komentar